“Pedies”

Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 555. I argomenc de chesta puntata l é: n projet nef per troèr cèsa te Fascia metù a jir dal Comun General en colaborazion co la Fondazion “Trentino Abitare”; la “Gran Festa da d’Istà” dedichèda chest an ai 80 egn da la gran scontrèda ladina sun Sela; la Maestra Margherita do 38 egn de servije te scolina la é jita en pension. La comunanza da Soraga la ge à sport so detelpai; “Ladiniatour – zeche de mat!” L festival de la musega ladina l é semper più vejin: chesta setemèna porton dant l grop “JULIAN & THE D-STREET BAND”.

Coche se sà la costion cèsa te Fascia la é belebon ria: l é n problema che tocia soraldut i joegn, singoi o cobies, e chi che vegn a lurèr da foradecà e che i volessa se enciasèr chiò. L Comun General en colaborazion co la fondazion “Trentino Abitare”, l vel sporjer n didament col troèr neves cartieres a fit e i meter a la leta de chi che à besegn. A chest propojit vegn pervedù ence n ofize de informazions che l sarà a la leta te Fascia ogne 3° vender del meis, a Sèn Jan aló da la senta del ANFFAS.

La Gran Festa d’Istà a Cianacei l é doventà n apuntament per duc i ladins del Sela e chest an, belimpont 80 egn dò da la gran radunanza del Sela, stata de messèl del 1946, l comitat de endrez l à volù ge la dedichèr a chel event. Via per d’aisciuda l é stat metù a jir na meisa torona dintornvia chest argoment e ades per la festa l é stat portà dant na sonèda duta neva dal titol “Ladins del Sela”. Per l’ocajion ence i raprejentanc istituzionèi i à recordà la costion ladina e l’emportanza de tegnir sù emportèr inant l lengaz, la cultura e l’identità desche un soul popul.

Ence per la maestra Margherita l é ruà l moment de la pension e la comunanza de Soraga la ge à fat na bela festa. L era l an 1987 canche l’à scomenzà so percors de scolina e te duc chisc egn l’à vedù passèr dedant n muion de bec de più generazions. Per l’ocajion l é stat portà dant rimes, matitèdes e cianties endrezèdes dal grop di joegn a chi che se ge à jontà apede ence la jent del paisc.

Dai 2 ai 4 de otober a Ortijei, a Cianacei e a la Ila, l’Union Generèla di Ladins dla Dolomites la metarà a jir l Ladiniatour, più avisa la rassegna de conzerc dediché a la musega moderna ladina. Per chest termin desvalives musizisć ladins i portarà sun paladina cianties neves, toc enjigné aposta per l’ocajion e per viventèr l lengaz de la mère. La redazion de Pedies la prejenta dantfora a si spetadores i desvalives gropes, i ciantarins e la ciantarines de la trei valèdes ladines che tolarà pèrt a chesta neva edizion. Te chesta puntata jon a cognoscer l grop: “JULIAN & THE D-STREET BAND”.

I reports de chesta setemèna i é stac enjigné e porté dant da Riccardo Zanoner e Angela Pederiva.