Una Terra.. cinque Lingue: Kanai ORF1 ont ORF Sport,

S geat envire ont s kimmp stercher s ensint va de Autonome Provinz va Trea’t ver en schutzn van sprochminderhaitn ont s kultural zòmmplaim van Euregio. Der zòmmtrèff van Sprochminderhaitn bou as toalnemmen de amministratorn ont vourstea’ner van istituzionen ont van dinstn ver de gamoa’schòftn va ladiner, bersntoler ont zimbern – as hòt se pfuntn en eirta as en earste van leistagest, vourtrong van provinzal assessor ver en envire trong van kennen va de autonomia, der Simone Marchiori kemmen prok en plòtz van president Maurizio Fugatti, hòt u’ganòmmen s bèlln van enviregea’ pet en kontratt ver za gem de òrbet en de bèrk El Towers S.p.A. ver za kriang de kanai ORF1 ont ORFSport. De trasmissionen va de osterreichesche bèrk barn kemmen galòck sechen as de gònze provinz ont barn gea’ envire iber de 15 van schanmikeal 2026 finz as de 30 van oberel 2029.

Abia derklort va de Viareren van Dinst ver de Sprochminderhaitn ont ausbendegen netzn va de Provinz Elisabetta Sovilla, de òrbet geat no en envireziachen ver drai jor de konvenzion zbischn de Autonome Region Trentin Sudtirol,  Euregio  ont de òllgamoa’ television ORF, u’ganòmmen en vourder oberel va de Regional junta.

Der doi be gip omport en de neatekait za gem de nochrichtn as meing sa sechen òlta ont junga aa, iber de digitaln piattaforme ver de nain generazionen ont de problem ugahenkt en de technologi van switch off van 2022. Gèltsgott en guat augea’ pet de El Towers S.p.A. as òrbetn ver de nètz va de lokalet sait, der segnal geat guat ider sèll as hòt vriarer kriak pet en ripetitor van joch Paganella. De lait barn meing envire gea’ za schaung de programmazion ORF as de kanai 75 (ORF1) ont 76 (ORF Sport) van digital terrestre, derzua aa de trèffn ver de nochrichtn abia „Südtirol Heute“.

Ibersetz gamòcht van Sprochtirl va de Tolgamoa’schòft Hoa Valzegu‘ ont Bersntol  – La versione in lingua italiana di questo articolo è stata pubblicata nei giorni scorsi su UT24