Una Terra … cinque Lingue: ORF1 un ORF Sport
Da autonome Provìntz vo Tria lekkse untar hèrta mearar zo schütza di zungmindarhaitn un zo sterchra di pintom pinn Euregio. Di Konferéntz von Zungmindarhaitn – boda nemmen toal aminstratör un vortretar von istitutziongen un mearare emtar von kamöüschaftn ladinar, möknar un zimbar – bodase iz gevuntet an erta in earst von herbestmånat, pittar vorsitzarung von provintzial asesór vürzovüara un zo macha khennen di Autonomì, Simone Mrchiori vortretar von vorsitzar Maurizio Fugatti, hatt ågenump di bölle zo vorlengra in kontràtt zuarzogeba in operatór EI Towers S.p.A. in dianst zo lazza seng di televisìf kanél ORF1 un ORF Sport. Di trasmisiongen vodar österraichegen televisiong bartn soin gesichart in da gåntz Provìntz un bartn gian vürsnen dòpo atz 15 von bimmat 2026, sin atz 30 von abrèl 2029.
“Bar soin in vortage von Tage vodar Autonomì un bar bizzan garècht ke di zungmindarhaitn soin ummana von bichtegarstn stützan bodase auhaltn, un sichar izta khent gemacht vil bege sidar in sèll 5 von herbestmånat von djar ’46 zo schütza di zungen von zungmindarhaitn. Zoang di kanél in da taütsch zung vodar österraichege televisong ORF in alle di lentar vodar provìntz khint auz voanan mångl von taütschan zungmindarhaitn, ma di bölle zo lazzase seng in da gåntz provìntz hatt ’z zil zo geba alln in laüt mearare linguistìk struméntn: soin guat zo vorstìanase zbisnen in lentar von Euregio iz eppaz grüntlich” asó hatta khött dar Marchiori.
Azpe da hatt khött di diridjénten von Dianst vor di Zungmindarhaitn un auzantn sachandarn vodar Provìntz Elisabetta Sovilla, daz sèll boda khint vürgelekk, khint nå dar vornaügarung vor di drai djar boda khemmen vodar konventziong zbisnen dar autonome Redjong Trentino-Südtiról, GECT un da öffentlesche sender ORF, sa ågenump in vorgånnate månat vo abrèl vodar redjonàl Djunta. Dar prodjèkt rispundart in mångl zo opfra an informatziong dèstar vor alle, gianante obar in naüng didjitàln plattformen un di spèrrn gepuntet in teknolòdjege switch-off von djar 2022.
Ankunto in akòrd pitt EI Towers S.p.A., operatór vodar lokàl tèknesche nètz dar senjàl est bart giana betar baz vorå baldar iz gest gepuntet in sèll boda hatt trasmettart dar ripetitór vodar Paganella. Di pürgar bartn mang gian vürsnen z’sega di progrémm vo ORF afte kanél 75 (ORF1) un 76 (ORF Sport) von didjitàl earde pinn informatif trèff o azpe „Südtirol Heute“.
Übarsetzt von Schaltarle vor di zung von Toalkamou vodar Zimbar Hoachebene – La versoine in lingua italiana di questo articolo è stata pubblicata nei giorni scorsi qui su UT24
