“Pedies”

Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 547. I argomenc de chesta puntata l é: l dì dla unité Ladina a Corvara, 80 egn do la gran radunanza ladina sun Sela; la festa per Bepi Dellantonio Tasin, che con sie 103 egn l é l menacrep più de età de la Tèlia; i leames veiores anter Fascia e Neva Ladina da trèr cà e descorir très lejendes, inomes de lech, tradizions e storia; la mostra de scultura e pitura metuda a jir tel veie tobià de Val a Vich e dedichèda a la lejendes ladines te

I 14 de messèl per i ladins de la Dolomites l é n di storich ajache del 1946, sun Sela sobito do la vera, se aea binà passa 3 mile jent da duta la valèdes per uzèr fora e revendichèr con forza l recognosciment ofizièl desche un soul grop linguistich ladin dolomitich. La Union Generèla di Ladins ogne an la met a jir vèlch scomenzadiva de recordanza. Chest an, en ocajion di 80 egn, l é stat endrezà l “Dì dla Unité Ladina” a Corvara olache l é stat portà dant na mozion de 12 ponc. Enche chest’outa vegn domanà l recognosciment e a la defendura de duc i ladins a na moda unitèra, con proponetes da portèr inant te la scola e a livel politich.

No l è segur roba da duc i dis ruèr a 103 egn e amò de manco esser l menacrep più de età de duta la Tèlia. Chest zil l è stat arjont da Bepi Dellantonio – Tasin da Moena doventà menacrep amò del 1951. Per l’ocajion l grop di Ciamorces de Fascia, de chel che fèsc pèrt belimpont ence Bepi, i ge à andrezà na bela festa a Ciampedel. Do la Messa i se à binà duc jun Pian de la teiles olache autoritèdes e coleghes alpinisć à portà dant recorc e dediches en so onor e l Cor Valfassa e i Schuhplattler i a viventà chest bel moment.

Tel passà la mont de Ciareja no l era n lech de confin, ma n post olache la comunanzes de Fascia e Neva Ladina se scontrèa manaman da spes. Belimpont con chest medemo spirit, aló dal Grand Hotel de Ciareja l é stat endò viventà chest leam de gra a la scomenzadiva culturèla metuda a jir da l’Union di Ladins de Fascia e dal Bildungsausschuss de Neva. Per l event l é stat metù jù n program culturèl de enrescida, musega e cianties, co la partezipazion de la Musega da Vich e del cor Singkreis Welschnofen. L é stat na scontrèda che l’à metù al luster coche la mont de Ciareja cogn seghitèr a esser n lech de fradaa e de stories condividudes.

A Vich l é n veie tobià del 500 che ades l é doventa n lech per ge dèr luster a l’èrt ladina. Chest l é apontin l nef projet del president de la Union di Ladins Fernando Brunel, che l à rità chest tobià da jent de cèsa. A inaudèr per prum la scomenzadiva l é stat l artist de nonzech Lois Rottonara – ROTT, co la mostra de depenc e scultures dedichèda a la Lejendes ladines dles Dolomites. L’inaudazion la é stata viventèda ence da la partezipazion e da la gran bela ousc de Susy Rottonara fia del artist. La mostra la é averta enscin ai 25 de messèl duc i dis da les 16.00 enfin da les 19.00.

I reports de chesta setemèna i é stac enjigné e porté dant da Riccardo Zanoner, Doris Valentini, Evelyn Bortolotti e Annarita Lollo.

Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN- vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).

L program l va fora ence sul canal 11 Prov. de BZ – vigni domenia da les 18.00 (sie da sera).

Se pel veder duta la puntates ence sul canal YouTube de TV Ladina sot chest link:  https://www.youtube.com/@TvLadina

La puntata de chesta setemèna la vegnarà fora entorn la medema ora de la televijion.

Se pel veder i report un a un su la piata Facebook de TV Ladina.  https://www.facebook.com/TelevijionLadina

Traduzion di Servijes Linguistics e Culturèi del Comun general de Fascia  –  La version ein lingua italiana di questo articolo verrà publicata nei  prossimi gionri qui su UT24