„Pedies“

Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 562. I argomenc de chesta puntata l é: la scontrèda endrezèda da l’Aministrazion de Comun de Cianacei co la comunanza per n moment de informazion e confront; Lucia Gross neva Presidenta de l’Union di Ladins de Fascia, pruma ela te la storia de la sociazion; Stèr apede 2026: scontrèdes tematiches per la families per rejonèr de demenza co la psicologa d.ra Paola Maria Taufer; In city golf: l tornoi de golf urban stat enstadì a Verona, a chel che à tout pèrt ence la fasciana Marika Favé.

L’aministrazion de comun de Cianacei en mèrtesc ai 3 de november l à chiamà ite la comunanza per n moment de confront e informazion en cont di lurieres che l é stat fat e che va amò inant, proponetes e scomenzadives per l paisc. L assessor ai lurieres publics Luigi Dantone e l ombolt Giovanni Bernard i à rejonà di lurieres per meter ju l metan te pisc che i va inant da egn e podessa jir en funzion chest’aisciuda, de chi ló da gejia de Sèn Florian per i sotservijes e l bosserlati, che i vegnarà endrezé ence ta Dèlba e sal Cuch e del pian di raions sotmetui a vincol storich che, de gra a n comissèr, l é do che l vegn lurà fora.

Intervista a Lucia Gross, la neva Presidenta de l’Union di Ladins de Fascia che enstadì à tout su la encèria do da la litazions states a Cianacei e a Sèn Jan ai 9 e ai 12 de otober. Apede a ela l president onorarie Antone Pollam, 9 conseieres confermé e 3 neves: Andrea Weiss, Alison Prinoth e Manuela Davarda. L nef Consei l restarà en cèria enscin del 2029 e l se met dant de jir inant col lurier fat ti egn passé con n eie ascort a la neva generazions ence de gra al didament de la diretora Nives Iori e a colaborazions percacentes per l bon de nosc raion e l stravardament del lengaz, de l’identità e de la cultura ladina te Fascia.

“Stèr apede 2026” la lingia de scontrèdes per familie endrezèda da la Ciasa de paussa de Sèn Jan co la dotora Paola Maria Taufer per rejonèr de demenza. Con chesta scontrèdes se vel fèr cognsocer miec la demenza e i ejic su la persona, sies besegnes e i besegnes de chi che ge stèsc apede. De gran emportanza l é poder e esser bogn de domanèr didament, percheche no l é sorì aboncont no ge vel se sentir soi e no ge vel se desmentiar de se enstesc.

L zenter de la zità de Verona per na dì l é doventà n ciamp da golf per la scomenzadiva In city golf, a chela che à totu pèrt ence Mirka Favé da Fascia. In city golf l é n tornoi urban nasciù del 2010 che vegn endrezà ogne an te desvaliva zitèdes d’èrt e lesc turistics de la Tèlia ma ence de l’Europa, defat la manifestazion la é nasciuda vin Ampez, dapò ti egn la é stata ence a Firenze, , Berlin, Viena, Dispruch, Trieste e Verona. 72 jiadores e 18 bujes, anter l’Arena, Piazza delle Erbe, via Mazzini e Castelvecchio. L jech doventa na ocajion per cognoscer la zità, olache ogne tiro l é na endesfida te n cianton da marevea.

I reports de chesta setemèna i é stac enjigné e porté dant da Doris Valentini, Annarita Lollo, Riccardo Zanoner e Angela Pederiva.

Traduzion di Servijes Linguistics e Culturèi del Comun general de Fascia – La versione in lingua italiana di questo articolo sarà pubblicata nei prossimi giorni qui su UT24