“Pedies”
Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 550. I argomenc de chesta puntata l é: l Consei General, l Pro Hockey Europe, n camp de aut livel dedicà a joegn atlec, l’inaudazion de la neva pèrt de la strèda da rodes anter Fontanac e Cianacei e l’aprofondiment per cognsocer l nef capofrazion de Poza.
En jebia ai 30 de messèl l é stat chiamà ite l Consei General del Comun General de Fascia, con 12 ponc al orden del dì. L é stat rejonà de sacotenc argomenc de enteres per l teritorie, anter chisc i servijes sanitères, co la neva Cèsa de Comunanza, l projet de la caserma Vittorio Veneto, la situazion del servije de la Coa di Picioi de Ciampedel. L é stat aproà estra apede la delega da man de trei comuns per la gestion di lurieres publics.
L Pro Hockey Europe l é n camp che ogne an chiama adalèrch sacotenc joegn atlec da dut l mond a Cianacei e a Selva. Vegn proponet arcedamenc spezifics, vidé da coach de nonzech, con percorsc dediché a jiadores e portieres, con sescions su la giacia e fora da la giacia. Na esperienza de formazion che met adum tecnica, confront e che deida a crescer a livel sportif, ge dajan a chi che tol pèrt l met de miorèr sia capazitèdes e viver fin jun fon l gust per l’hockey.
Co l’inaudazion de la pèrt neva anter Fontanac e Cianacei, la strèda da rodes de Fascia e Fiem la é da poder fèr en segureza per 48 chilometres, da Molina a Penia. N lurier dalbon spetà, pissà tant per la jent dal post che per i ghesć e che favoresc la mobilità sostegnibola. L nef percors lench 6,5 chilometres, l vegnarà durà ence d’invern per enjignèr l portoi de la Marcialonga. Endèna se vèrda al davegnir col intervent de coleament envers Vich e chel de spartir chi che va a pe da chi che va co la rodes.
Co l’intervista al nef Capofrazion de Poza, Gabriele Detomas, jon a cognoscer i intervenc che l Consei se met dant. Anter la prioritèdes l é meter a post l bosch, destrametù dal becherle, e la manutenzion de la strèdes da bosch. L é chela ence de valorisèr la mèlghes: se chela de Contrin la va inant belebon da n muie de egn en ca, ades ge vel meter a post e averjer chela de Munciogn.
I reports de chesta setemèna i é stac enjigné e porté dant da Angela Pederiva, Annarita Lollo e Riccardo Zanoner.
Se pel veder duta la puntates ence sul canal YouTube de TV Ladina sot chest link: https://www.youtube.com/@TvLadina
La puntata de chesta setemèna la vegnarà fora entorn la medema ora de la televijion. Se pel veder i report un a un su la piata Facebook de TV Ladina.
https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia – La versione in lingua italiana di questo articolo verrà pubblicata nei prossimi giorni su UT24
