Una Terra…cinque lingue: speciale “La Valle di Fassa tra fantasia e realtà”

Domenica di Pasqua, primo aprile 2018 a Vigo di Fassa è stato presentato il libro, edito da Curcu Genovese, dal titolo “La Valle di Fassa tra fantasia e realtà” scritto da Alberta Rossi di Soraga. Il libro, curioso, piacevole, simpatico e fresco, è formato da racconti che si ispirano ai soprannomi degli abitanti dei paesi della val di Fassa, è scritto in italiano intercalato da dialoghi, parole e toponimi, della bella lingua ladina. Per ogni racconto c’è anche la descrizione di una caratteristica del paese, una festa, una tradizione, una ricetta o un luogo, il tutto permette a ladini e turisti di conoscere piccole curiosità sulla valle e sulla gente. E’ arricchito dai disegni in bianco e nero dell’artista Elena Corradini che danno forma e vita, a personaggi mitologici e luoghi che si trovano nella realtà, davvero molto belli.  – di Annelise Vian.

Domenia de Pèsca , prum de oril 2018 sa Vich l’é stat na belota prejentazion del liber dal titol “La Valle di Fassa tra fantasia e realtà” scrit da Alberta Rossi da Sorèga.

La scontrèda, sporta da la Pro Loco de Vich, la é stata reta te na maniera n muie bela e piajegola da Irene Deflorian, che l’à metù al luster ence l bel moment endrezà per i bec per poder dèr vita a la contìes de la publicazion.  Del liber à rejonà la scritora de nonzech Bruna Maria Dallago Veneri che l’à ence recordà sie leam con Alberta e con Larcioné, olache l’à cognosciù n muie de persones da zacan che ge à contà de tradizions e usanzes, tant che ades, ela, ence se la é del Südtirol, la se sent dalbon a cèsa sa Vich.

Alberta Rossi, che con sie bel fèr paruscent e fresch, l’à rejonà de la rejons che l’à portèda a scriver chest liber, l’é stat sie fon amor per la val de Fascia, per la rejonèda ladina e per la natura, ensema a l’esser curiousa de entener da olache vegn cerc inomes per ladin de lesc o sorainomes che l’é te noscia val.

La scontrèda la é stata endeletèda da la bela musega del grop 3D Project family, père e doi fies, n tous e na tousa da la ousc maraveousa, i à dassen encantà con cianties per talian, engleis, e ence fascian, dassen bravi.

N ùltima l’é stat ence l salut de la autoritèdes: Leopoldo Rizzi ex capocomun de Vich, Mirella Florian Sorastanta de la Scola Ladina de Fascia, Fernando Brunel President de l’Union di Ladins de Fascia e Fabio Chiocchetti Diretor de l’Istitut Cultural Ladin de Fascia “Majon di fascegn”, duc à abù paroles de lauda per Alberta Rossi e per sia bela publicazion.

L liber l’é n muie curious, piajegol e paruscent, l’é scrit per talian, con ite bela rejonèda fascènes, parola ladines e inomes de posć per ladin. Vegn sobito voa del lejer ajache per duc i paìjes l’é na contìa aldò del sorainom di sentadins, l’é dapò na picola descrizion che fèsc descorir amò de più chela comunanza, pel esser na festa, na tradizion, na rezeta o na usanza, chest dèsc l met ai foresć e ence ai fascegn, de cognoscer più a fon noscia val e noscia jent.

Meton Ciampedel, i ge disc i “Beches”, l’é ence n “Bosch di beches”, l paìsc l’é su la seides de la Mont de Sousc e da chesta fregoles anter verità e fantasìa se dejouc na zis bela contìa ensaorida da strionaments e encanteisem. Vegnan dal storich vièl da Sousc e ju per Duron, zacan, l’é ruà a Ciampedel n zis bel tous che à fat enamorèr duta la femenes del paìsc, da la touses a chela maridèdes, giusta che vindedò a chel bel mus, se sconea l malan che, con fuscernèdes, l ciapèa via l’ènema a chi che sutèa te sia teneta, demò con n calzedrel encantà se aessa podù se librèr dal strionament.

L liber l tol ite ence i bie dessegnes n bianch e fosch de Elena Corradini che col lapisc la dèsc vita a la fegures de la contìes desche Salvans, Bregostènes e Vivènes. Apede l’à fat ence n bel gran lurier endrezan picola scempia mapes per dèr l met a chi che lec de entener olache se troa i posć coscita che se pel jir ai descorir.

L’é donca n bel liber, piajegol, grignolent e paruscent, che fèsc sgolèr col pensier anter storia, verità e encanteisem. De bie compliments a Alberta Rossi co l’augurie che la seghite a scriver amò e semper co l’amor de noscia val tel cher.