“Pedies”

Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 564. I argomenc de chesta puntata l é: ai 12 de november l é stat chiamà ite l Consei General con 11 ponc tel orden del dì; pea via la quarta edizion de la rassegna de teater ladin con la partezipazion preziousa di gropes de teater e endrezèda dai Servijes Linguistics e Culturèi del Comun General de Fascia; neva energies per la Crousc Biencia de Cianacei che ades à a la leta n grop de joegn arlieves; GioKino: n projet nasciù per endrezèr seres per jièr coi jeghes da desh te Chino de Cianacei
Ai 12 de november l é stat chiamà ite l Consei General con 11 ponc tel orden del dì. Anter i ponc traté, la responeta a na interogazion che revèrda l nef ospedèl, i servijes sanitères de la cèsa de la comunanza, n mudament al regolament per l funziament del Consei General e la aproazion del Pian Organich de Politica Linguistica 2027.
Ai 26 de november l grop de teater La Mizacoles de Ciampedel orirà ofizialmenter la quarta edizion de la rassegna de teater ladin, dedichèda a Vigilio Iori, co la comedia “L é dut n craut” de Giuseppe Della Misericordia. La rassegna va inant col grop di Bontemponi che spilenarà “L aereo più svergol del mondo” de Camillo Vittici. Dant de la festes da Nadèl l grop Antermoia jirà sun paladina co la comedia “L inventor del ciaval” ispirèda al test de Achille Campanile. Da carnascèr se tirarà la coltrines col grop de la mèscres de Dèlba e Penia che porta dant doi spetacoi dal titol Fascia, paussa in pèsc, mascherèda scrita da Nicoletta Riz e la Mort sul Zirm de Simon de Giulio. Con chesta “Mascherèdes” se sera su la 4° rassegna de teater per ladin.
Neva ressorses per la Crousc Biencia de Cianacei che à formà n grop de joegn arleves volontères. Na ressorsa preziousa e ocajions emportantes per engaissèr i joegn a fèr volontariat, con esperienzes per didèr i etres che fèsc doventèr responsaboi, olache pel nascer de neva amicizies e valores per se sentir utoi e fèr pèrt de zeche de più gran.
Giokino: l projet nasciù da INOUT tel anbit del Pian di Joegn La Risola, da olache l é nasciù l grop Dadoi. Se trata de jeonec engaissé de jièr coi jeghes da desch che endreza seres per duc per jièr aló dal Chino de Cianacei, aldò de na ispirazion de aivitèdes de chesta sort, jà cognosciudes te la valèdes apede. Per smaorèr la cognoscenza di jeghes da desch e per ge portèr dant la novitèdes a amisc e engaissé, Dadoi l é jit al Lucca Comix.
I reports de chesta setemèna i é stac enjigné e porté dant da Doris Valentini, Riccardo Zanoner e Angela Pederiva.
Traduzion di Servijes Linguistics e Culturèi del Comun general de Fascia – La versione in lingua italiana di questo articolo sarà pubblicata nei prossimi giorni qui su UT24






