“Pedies

Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 560. I argomenc de chesta puntata l é: la prejentazion de la neva bandiera del Grop di Studafech Volontères de Cianacei; la mostra geologica itineranta de la Fondazion Dolomites Unesco; na scontrèda de sensibilisazion e prevenzion del tumor al piet; l’inaudazion del Bait de la Eves del Istitut Cultural Ladin Majon di Fascegn

L Grop di Studafech Volontères de Cianacèi à prejentà sia neva bandiera, studièda fora e dessegnèda dal professor Claus Soraperra e benedida da don Mario Bravin en sabeda ai 17 de otober. Chest renovament à raprejentà n passaje emportant per l grop che volea respetèr l fon leam co la bandiera storica. La verscion neva mantegn l’iconografia de Sèn Florian e la ge é stata dedichèda a Franz Dantone Pascalin, prum comandant del grop. La enrescida storica l à dapò dat l met ence de troèr ca n blason ofizièl. La veia bandiera la vegnarà metuda sot vierech acioche duc posse seghièr a recordèr l passà e la persones che à dat sie contribut al grop.

La mostra geologica de la Fondazion Dolomites Unesco la é ruèda ence te Fascia, te Liceo Artistich, con un percors interatif dedicà a la formazion de la Dolomites. Spartida te 9 sezions, la porta dant argomenc desche l mudament climatich, l turism e l stravardament del ambient. I studenc del liceo scientifich, che se à enjignà a fèr da guides, i compagna i vijitadores a cognoscer l patrimonie geologich. La scomenzadiva à a cher la cognoscenza del teritorie, la valorisea la competenzes di studenc e la sensibilisea la comunanza su l’emportanza de la sconanza ambientèla. La mostra la restarà averta enscin ai 27 de november.

En mèrtesc ai 20 de otober, a Sèn Jan, l é stat na scontrèda dedichèda a la prevenzion del tumor al piet. Espertes del setor sanitèr les à sotrissà l’emportanza de na diagnosa bonoriva, de stii de vita sègn ma ence di percorsc de cura. Chesta scontrèda la é stata proponeta da la sociazion “Lotus Oltre il tumore al seno”, che ogne dì la se dèsc ju per ge stèr apede e sostegnir la femenes che à abù na diagnosa de tumor, sporjan vejinanza e suport, acioche nesciuna se sente soula te n percors tant delicat.

L Istitut Cultural Ladin l à inaudà l Bait de la Eves de Ronch, che ades à troà post apedejù la senta del Istitut. Una strutura storica restaurèda, testamonech de la tradizion del arlevament de la eves e de l’identità culturèla de Fascia. Dal restaure l é vegnù ca curiositèdes architetoniches e simboliches leèdes ence a la protezion de la eves. Ades chest bait l é a la leta per projec didatics e culturèi, da spartir dessema coi arlevaeves, co la scoles e co la comunanza, col obietif de valorisèr e portèr inant na tradizion presiousa, metan adum l passà co la pratiches de arlevament d’aldidanché.

I reports de chesta setemèna i é stac enjigné e porté dant da Doris Valentini, Riccardo Zanoner e Annarita Lollo.

Traduzion di Servijes Linguistics e Culturèi del Comun general de Fascia – La versione in lingua italiana di questo articolo è stata pubblicata nei giorni scorsi qui su UT24