Learnen en Euregio petn spil
Quase 242.000 studentn, va de earste as de zbaite schual va zbaite grat, de vourder boch hom embiart s schualjor 2026/2027 en Euregio ont s doi tuat au de moglechket za vertiaven s kennen van Euregio: s sai’ vil de didaktische vortschbinnen as lòng kennen de gschicht, de kultur ont de ausònderhait van sprochen, ont de zòmmòrbet va haitzegento zbischn de drai eirter. En lest schualjor, der Euregio hòt drinnzouchen ungefèr 3.100 kinder ont jungen pet de doin attivitetn.
De u’learn ont formativen vourtschbinnen
No as der ist kemmen vernaiert s kimmp gamòcht bider der prais “Euregio mòcht schual”: de klassn van òlla drai de lander meing toalnemmen, austoalt en drai saitn ver de eltekait, turch de saitn va de u’lear online scuola.euregio.info .
De schualn meing se u’mèlln en programm “Euregio trèfft de schualn ”. Turch quiz ont spiln, de klassn va de viarte klasse va de earste schual finz as de vinfte klasse va de oubernschualn meing kennen der Euregio dirèkt en de eigene sitz va de schual oder kan sitz van Euregio ka Casa Moggioli ka Trea’t. De vrong meing kemmen vourtrong van 14 van leistagest finz as de 15 van schanmikeal, oder finz as hòt nou plòtz. De trèffn barn se hòltn òlbe der pfinsta.
Men s de schualn va almen zboa lander van Euregio leing se oa’ne zòmm ver a stòttpartnerschòft vour as de 30 van òlderhaileng meing vourtrong de vrog ver za kriang der nu’m va “Schual Stòttpartnerschòft van Euregio”. En schualjor 2025/2026 der numer van stòttpartnerschòftn ist gabòcksn va 17 finz an total va 35 schualn.
Bail en gònze jor, de klassn va òlla drai de lander meing untersuachen de interattiv austellung van Euregio kan Infopoint va Innsbruck pet untersuachen pfiart ont roasn en de zait. En de temen as schoa sai’ – zbischn de beiln s sai’ de la’nochrichtn, der Tour of the Alps, de aispèrng, de gruabn, s glam ont de Olimipiadi – s bart kemmen gamòcht aa van 12 van schanmikeal de sezion ver de flusslontschòftn.
Der Euregio pakimmert se as òlla de studentn schelltn kennen de istituzionen va de Europeische Union bail as de sai’ za schual, ver dòs de vourstea’ner van Euregio opfert informazionen ver an iata vrog ver an untersuach za Bruxelles. Derzua s kemmen organisiart untersuachen ver de schualn asou as de studentn meing se mòchen an idea va de òrbet as kimmp gamòcht va de vourstea’ner van Euregio en livell va de europa.
A toal schualn sai’ ausònderst u’gahenk en Euregio: oa’dleva schualn mòchen de “Euregio nètz van schualn va agraria ont hausbirtschòft”, derbail de ouber techniker schual Marie Curie (FOS va Meran), pet en sai adress “EUregio” trok envire s kennen van glaichen burzn, gamoa’ u’lear, s kennen va mearer sprochen ont s zòmmòrbetn.
Ibersetz gamòcht van Sprochtirl va de Tolgamoa’schòft Hoa Valzegu‘ ont Bersntol – La versione in lingua italiana di questo articolo è stata pubblicata nei giorni scorsi su UT24
