“Pedies”

Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 553.

I argomenc de chesta puntata l é: l’inaudazion de la mostra Art è Donna, endrezèda da la sociazion La Voce delle Donne, che chest an la ge é stata dedichèda a Giana Sommavilla; l Hockey Club Fassa Falcons l à prejentà sia formazion. Per l’ocajion, apede a la squadra senior l é stat portà dant duta la squadres de la desvaliva categories; l’à inom “Biennale Gherdëina 10” – (Future) Paradise Gardens la diejema edizion de la rassegna de èrt contemporana che se pel jir a veder vin Gherdena scin ai 13 de setember; Ladiniatour – zeche de mat! Per se enjignèr al festival de la musega ladina che vegn metù a jir al scomenz de otober ve porton dant i partezipanc: chesta setemèna l grop Sun Sëida da Gherdena.

Ruèda a sia diejima edizion, ence chest an “Art è Donna” auza fora l’èrt de la femenes con na mostra coletiva te la “sala rosa” del Comun de Pardac. Endrezèda da la sociazion La Voce delle Donne, la scomenzadiva la ge é stata dedichèda a Giana Sommavilla, recordèda ence tras sia operes. 17 artistes da Fascia e Fiem met fora sie lurieres che conta de emozions, fragilità, forza e reflescions personèles anter depenc, fotografies e scultura. Se pel veder la mostra enscin ai 15 de setember, na ocajion ence per cognoscer l’atività de la sociazion.

L Hockey Club Fassa Falcons à prejentà ofizialmenter la formazion de la sajon 2026/27. N event che à chiamà te Stadie de la giacia duta la familia del Hockey Fassa, dai più picioi fin a la squadra senior. Endèna la prejentazion l é stat rejonà ence del Hockey College, de la colaborazion col Gherdena e di obietives per la neva sajon, che no revèrda demò i resultac sportives, ma ence de engaissèr la jent dal post a jir a veder la partides.

La dieijema edizion de la Bienala de Gherdena l’à portà te val 24 projec de 28 artisć dal post e da foradecà. Col titol “(Future) Paradise Gardens”, chesta rassegna de èrt contemporana la met dant na reflescion dintornvia l raport anter om e natura, e la vel entener l vidor desche n spazie per l benesser e per l’imaginazion, envian i vijitadores a se fèr domanes su la endesfides ambientèles d’aldidanché. Anter video, instalazions, atelier a la lèrgia e evenc per gregn e picioi, se podarà veder la operes enscin ai 13 de setember.

L’Union generèla di ladins dla Dolomites la met endò a jir l Ladiniatour, più avisa l conzert dedicà a la musega moderna ladina. Dai 2 ai 4 de otober a Ortijei, a Cianacei e a la Ila, musizisć ladins i portarà sun paladina sia cianties neves, toc enjigné per ge dèr sbunf a la cianties fates tel bel lengaz de la mère. Per se enjignèr a chest event la redazion de Pedies la vel portèr dant e fèr cognoscer a si spetadores i desvalives gropes, i ciantarins e la ciantarines de la trei valèdes ladines che tolarà pèrt a chesta neva edizion. Te chesta puntata jon a cognoscer l grop Sun Sëida da Gherdena.

I reports de chesta setemèna i é stac enjigné e porté dant da Doris Valentini, Angela Pederiva e Riccardo Zanoner.

Traduzion di Servijes Linguistics e Culturèi del Comun general de Fascia – ça versione in lingua italiana di questo articolo verrà pubblicata nei prossimi giorni qui su UT24