„Pedies“
Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 546. I argomenc de chesta puntata l é: i rangers su la Dolomites, neva persones enciarèdes per monitorèr l teritorie, dèr informazions ai ghesć e per didèr dò n turism più responsabol; la neva via ferata sun “Crepa Neigra” nasciuda da n’idea de la guides de Fascia e metuda en esser col didament di impianc portamont de la Sozietà Ciampac; per la rubrica “Lesc: cuchèr te ogne piz e cianton”, porton dant la cèsa de comun de Cianacei n lurier metù ensema dal architet de nonzech Ettore Sottsass senior.
Con chest istà ence te Fascia e dintornvia l Lech de Ciareja l é stat tout sù e enciarià neva persones co la funzion de “Ranger”: più avisa col obietif de portèr inant n projet out a n maor control, a na gestion responsabola del teritorie e soraldut con chela de ge sporjer desvaliva sort de informazions ai ghesć che vel se goder nesc monc e troes. L é na scomenzadiva con chela che se vel ruèr più apede a la jent che la vel saer zeche de più e che la domana desvaliva curiositèdes e aspec leé a nosc teritorie.
Crepa Neigra l é l inom de na crepa foscia, sora l paisc de Cianacei, che la se tol fora da la crepes dolomitiches chières. Chest percheche la é nasciuda dai vulcans. E belimpont sun chesta picola crepa l é stat enjignà na neva ferata. L é stat na scomenzadiva di menacrepes de Fascia che la é stata touta su ben volintiera da la sozietà impianc portamont de Ciampac. De gra al percors enjignà, se pel aprijièr dassen dut l bel da la Dolomites ajache se à na veduda a 360 degrees che muda beleche a ogne vèrech. La ferata la é stata inaudèda enstadì con gran sodesfazion di ideatores.
Per la rubrica “LESC”, te chesta puntata vegn portà dant la senta del Comun de Cianacei. N frabicat fat su a la fin di egn ’20 lurà fora dal architet Ettore Sottsass senior, n profescionist de nonzech che l se à vadagnà de gregn recognoscimenc dutintorn. So lurier no l se à fermà demò a la projetazion de cèses: el l se à fat cognoscer ence per sia idees de design, ciamp olache l è stat bon de meter al luster so talent artistich. Dut chest l vedon belimpont ence te la cèsa de comun de Cianacei olache, de gra al intervent de Gabriele Valentini, vegnarà moscià e spiegà la particolaritèdes de chest frabicat ence te sia pèrt daite.
I reports de chesta setemèna i é stac enjigné e porté dant da Riccardo Zanoner, Evelyn Bortolotti e Doris Valentini.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN– vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc). L program l va fora ence su canal 11 Prov. de BZ – vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina
La puntata de chesta setemèna la vegnarà fora entorn la medema ora de la televijion.
Se pel veder i report un a un su la piata Facebook de TV Ladina.
https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia – La versione in lingua italiana di questo articolo verrà pubblicata nei prossimi gionri qui su UT24
