“Pedies”
Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 529.
I argomenc de chesta puntata l é l spetacol “Miss Sbarbie” portà dant a Cianacei en ocajion del Dì internazionèl de la eles, la garejèdes de Copa del Mond sun Sèn Pelegrin, e la rubrica “Svampol ciatarul: dedichèda a Elisa Vian che la ne conta de sie percors per doventèr la femena determinada de anchecondì
L Comun General de Fascia, l grop Circenesema, l Chino Marmolèda e la biblioteca de Cianacei adum i à endrezà na sera de spas e sensiblisazion en ocajion del dì internazionèl de la eles. La sera la é peèda via co n aperitif leterèr, n moment de confront e barat informal. Dò l é stat portà dant la performance de l’artista Morgana Morandi, che la se à prejentà con sia 101 Barbie e 1 Ken uman. L messaje per la eles volea esser chel de jir fora da la costrizions de coche la sozietà veit e la vel la femenes, lurèr su l’emportanza de coche se é, sul esser se enstesses a na maniera originèla e autentica.
L é stat n fin de setemèna ecezionèl per Sèn Pelegrin l ultim week end. Resultac sportives de gran valuta e comenc positives da dut l mond del schi per l’organisazion e per duta Fascia. De gregn aprijiamenc i é rué ence per l Comitat Gregn Evenc e duta l’organisazion. N suzess che l à vedù 130 televijions coleèdes da dut l mond e passa 7mile spetadores. L obietif ades l é chel de portèr ogne an chesta garejèdes de Copa del Mond te Fascia.
Per la rubrica “Svampol ciatarul: jent che fèsc jerveèr sie cunst”: Elisa Vian ne conta de sie percors per doventèr la femena determinada de anchecondì. Elisa la é da Vich, la é psicologa e la porta dant percorsc de formazion de soft skills: più avisa la deida e la ge stèsc apede ai imprendidores per ge didèr a tirèr fora la pèrt miora de se. Ela la ne conta de coche la é ruèda a chest resultat, de si studies de psicologia a Roma, de canche l’à lurà desche formadora te na firma e de coche l’à avert sia pruma filiala a Busan. L valor de so lurier l é leà en gran pèrt a la comunicazion e a la negoziazion. Ma no demò; te si percorsc vegn dat gran emportanza ence a l’empatia, e a la emozions. Aldò de sia vijion, te l’era de l’inteligenza artifizièla l é n muie emportant aer coscienza de nosc esser uman, entener la emozions e saer les durèr.
I reports de chesta setemèna i é stac enjigné e porté dant da Angela Pederiva e Riccardo Zanoner.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN- vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc). L program l va fora ence su canal 11 Prov. de BZ – vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link: https://www.youtube.com/@TvLadina
La puntata de chesta setemèna la vegnarà fora entorn la medema ora de la televijion.
Se pel veder i report un a un su la piata Facebook de TV Ladina. https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia – La versione in lingua italiana di questo articolo è apparsa nei giorni scorsi qui su UT24
