“Pedies”
Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 525. I argomenc de chesta puntata l é la performance teatrèla dedichèda al prof. Vigilio Iori rechia, l conzert “olimpich” del Grop ladin “GANES” fat dut da eles, la rubrica “Svampol Ciatarul” con protagonist l joen Mattia Valentini – Soricia.
A pech più che 3 egn da la departida del prof. Vigile Iori, la Union di Ladins de Fascia e la Scola Ladina à volù l recordèr co la publicazion de “L Picol Prinz” e na performance teatrèla touta fora dal medemo test. Se à creà n’atmosfera de gran pascion e sentiment te scola dintorn l recort de Vigile Iori olache amisc, dozenc, compagnes de letradura, teater e auter i se à troà per l recordèr. A el ge è stat dedicà l codejel del Picol Prinz traslatà per ladin fascian da Stefen Dellantonio Monech, n test l è stat dit che l lo raprejentea sot desvalives aspec, sibie dal pont de veduda uman che cultural.
Anter i evenc dintornvia la olimpiades te Fiem, l é stat metù a jir ence l conzert del grop Ganes de la Val Badia a Tieser. Per l’ocajion l é stat prejentà so nef album dal titol VIVES! Na regoeta de cianties e musiches che vel esser na lauda a la vita, fata de legreza, forza, stories de n’outa e tradizions. Recordon che la ciantarines de chest grop les é nasciudes e cresciudes te Badia e enceben che les vegn chiamèdes a portèr dant sia musica dutintorn, a livel internazionèl, les é n muie leèdes a sia cèsa e sia valèda. Sia cianties les tol ispirazion da so ambient, da sia tradizions, les conta de sia jent, de stories passèdes, ence co na pizèda de encresciujum.
Per la rubrica “Svampol ciatarul: jent che fèsc jerveèr sie cunst”: instouta porton dant l joen Mattia Valentini de Soricia che l ne conta de so percors fat con gaissa e neva aventures tel ciamp de la radio e del podcast. Mattia l é n jon da Cianacei, l studia enjegeria a Trent e l se dèsc ju ja da vèlch an co la comunicazion per chela che l à na gran pascion. Te so percors l à jà metù a jir desvaliva trasmiscions desche interjoegn, waypoint. L à colaborà e l colaborea ence amò ades con n muie de radio locales desche Radio Record, Radio Gherdena, Radio più de Agort, Radio Cortina e autra amò. Ades l fèsc ence l speaker ofozièl de manifestazions sportives. N joen con jà na cariera enteressanta e n muie de enteresc.
I reports de chesta setemèna i é stac enjigné e porté dant da Angela Pederiva e Riccardo Zanoner.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN– vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc). L program ades l va fora ence sun TV – canal 11 de BZ – vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link: https://www.youtube.com/@TvLadina
opuramenter se pel veder i servijes un a un su la piata Facebook de TV Ladina https://www.facebook.com/TelevijionLadina
Traduzion di Servijes Linguistics e Culturèi del Comun general de Fascia – La versione in lingua italiana di questo articolo è stata pubblicata nei giorni scorsi su UT24
