“Pedies”

I argomenc de chesta puntata l é: porton dant la neva Sorastanta de la Scola Ladina de Fascia, la professora Mattea Eccher, che met al luster endesfides e obietives per l nef an de scola; l à inom “Notes, mans e cher” l event de solidarietà endrezà a Soraga per binèr su fondi e sostegnir Paolo, Angela e sie fies te n moment de besegn; PIROL – L’Apt de Fascia à pissà a n projet per contèr e portèr dant Fascia a na vida scempia e gustegola tras i comics; “Ladiniatour – zeche de mat!” Per se enjignèr al festival de la musega ladina che vegn metù a jir al scomenz de otober ve porton dant i partezipanc: chesta setemèna l grop Nëus Doi da Selva.

Scomenza n nef an de scola con vèlch neva te Fascia. Col 1° de setember pea via a na vida ofizièla la encèria de la neva Sorastanta de la Scola Ladina de Fascia, la professora Mattea Eccher, per egn professora de engleis. A ela ge é stat domanà de portèr dant la endesfides e i obietives pervedui per l nef an de scola aldò ence del smendrament demografich.

N burt azident à mudà la vita de Paolo, de sia femena Angela e sie doi fies. Ma amò na outa la solidarietà se à palesà tras notes, mans e cher. La notes del grop Folk de Fascia del Pentagramma, la mans di volontadives che à enjignà e donà sie lurieres per l marcià solidal e l cher de duta la jent che se à strent te n braciacol a Paolo e a sia familia. A Soraga chest l é stat l event portà dant da la Sociazion Bambi che da egn se dèsc ju per l sostegn de families con bec picioi che vif te na situazion senestra.

PIROL chest l titol del codejel che coi comics l conta de Fascia e de sia jent. L é na neva scomenzadiva metuda a jir diretamenter da l’APT che a chesta moda l’à volù portèr dant na sort de sperimentazion outa a prejentèr e fèr cognoscer la val sot la forma de stories, più o manco reèles, contèdes coi dessegnes.

L’Union generèla di ladins dla Dolomites la met endò a jir l Ladiniatour, più avisa l conzert dedicà a la musega moderna ladina. Dai 2 ai 4 de otober a Ortijei, a Cianacei e a la Ila, musizisć ladins i portarà sun paladina sia cianties neves, toc enjigné per ge dèr sbunf a la cianties fates tel bel lengaz de la mère. Per se enjignèr a chest event la redazion de Pedies la vel portèr dant e fèr cognoscer a si spetadores i desvalives gropes, i ciantarins e la ciantarines de la trei valèdes ladines che tolarà pèrt a chesta neva edizion. Te chesta puntata jon a cognoscer l grop Nëus Doi da Selva.

I reports de chesta setemèna i é stac enjigné e porté dant da Annarita Lollo, Angela Pederiva e Riccardo Zanoner.

Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol, “Pedies” l va fora su Trentino Tv – canal 10 Prov. de TN– vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).

L program l va fora ence sul canal 11 Prov. de BZ – vigni domenia da les 18.00 (sie da sera).  Se pel veder duta la puntates ence sul canal YouTube de TV Ladina sot chest link:  https://www.youtube.com/@TvLadina  – 

La puntata de chesta setemèna la vegnarà fora entorn la medema ora de la televijion.  Se pel veder i report un a un su la piata Facebook de TV Ladina.  https://www.facebook.com/TelevijionLadina

Traduzion di Servijes Linguistics e Culturèi del Comun general de Fascia – La versione in lingua italiana di questo articolo sarà pubblicata nei prossimi giorni qui su UT24