I Zentres traumatologics de Sèn Jan e Madonna di Campiglio i vegnarà endò averc

Coi 15 de jené i ambulatories ortopedics e traumatologics de Sèn Jan e Madonna de Campiglio i vegnarà endò averc. L é stat troà i infermieries che l é debesegn per stèr apede ai dotores spezialistics, tecnics de radiologia e personal aministratif che i consent coscita l completament del organich di ambulatories per esser operatives, aldò di standard domané.

L obietif l é chel de arsegurèr n intervent vertech e vejin a chi che pel se fèr del mèl sui portoes da schi. L ambulatorie traumatologich de Sèn Jan l sarà ence n pont de referiment sanitèr de valuta per Fascia endèna l temp di Jeghes olimpics Milan-Cortina.

Te la doi strutures, gestides da l’Azienda sanitèra universitèra integrèda del Trentin, sarà operatives dotores spezialisé te ortopedia e traumatologia, con apede infermieres, tecnics de radiologia e personal aministratif, col obietif de arsegurèr n pont de referiment sanitèr publich per l tratament de chela sort de traumatologia che no l’à na urjenza da vegnir tratèda te ospedèl. I Zentres traumatologics i sarà averc duc i dis e i lurarà en sinergìa respetivamenter co l’Unità operativa de ortopedia del ospedèl de Ciavaleis e con chela del ospedèl de Tione. Chi che à debesegn i podarà se oujer diretamenter, zenza besegn de empegnativa, demò co la tessera sanitèra.

Zenter traumatologich ortopedich de Sèn Jan – San Giovanni di Fassa – str. di Pré De Gejia 4. Telefon: 0462 761025. L ambulatorie l sarà avert da les 10 a les 19, duc i dis ence festa e vea, dai 15 de jené enscin a la fin de la sajon.

Zenter traumatologich ortopedich de Madonna di Campiglio – viale Dolomiti di Brenta 158/ter, località Colarin. Telefono: 0465 331580 L ambulatorie l sarà avert da les 10 a les 18, duc i dis ence festa e vea, dai 15 de jené enscin a la fin de la sajon.

Traduzion di Servijes Linguistics e Cultur̬i del Comun general de Fascia РLa versione in lingua italiana di questo articolo ̬ stata pubblicata nei giorni scorsi qui su UT24

 

.