La femenes da mont

La “Majon di Fascegn” vel recordèr Flavio Faganello (1933-2005) con n recital dut al feminin che vegnarà portà dant te la bela cornisc de la “Sala Grana” del veie Tobià de la Pieif, olache à sia senta l Istitut Cultural Ladin de Sèn Jan.
En ocajion del dì internazionèl de la fotografia, en mèrtesc ai 19 de aost 2025 da les 9 da sera (entrèda debant) l recital “Le donne nelle stagioni della montagna – La femenes te la sajons da mont” l troarà esprescion tel cher de noscia Val de Fascia per viver e scutèr, tras i retrac, la oujes e la emozions de chi che à fat n toch de strèda ensema a Flavio Faganello.

Chest maraveous fotograf e fotoreporter trentin l é stat bon de fèrmèr te sie click de gran sensiboltà e pascion, l temp e l mond bacan da enlouta (fin ite ti egn Otanta), che jia inant te anter la stentes e la fadies de la vita da mont te Fascia e te duta la region.

Tel zenter de sia opera, fona, poetica e tel medemo temp ence de documentazion, l à metù la femenes tel essenzièl de sia ejistenza, te mez a n ciamp a semenèr, su na mont a restelèr, co la besties a vejolèr, te majon a fèr i fac.

E, tel les tor ju, Flavio Faganello chesta femenes l les à enlumenèdes.

Te chesta creazion, la fotografies toutes fora dal liber de Flavio Faganello “Con voce di donna” (Cierre Edizioni) e proietèdes sul schermo, les ciapa vita tres la oujes de Chiara Turrini e Beatrice Scartezzini, che met apede e mesceida, te chest recital, pizèdes poetiches de Verena Faganello e de Franco de Battaglia, poejies de Marco Pola, tesć originèi de Stefania Scartezzini e museghes spilenèdes al piano da Lorenza Anderle e al violoncel da Veronica Beber. Dut dal vif.