“Pedies“
Ence chesta setemèna l é a la leta l nef apuntament de “Pedies”, rotocalch ladin de informazion, ruà a la puntata n. 490. I argomenc de chesta setemèna l é:
- Na scontrèda per rejonèr endò de Ladin Standard. L Istitut Cultural Majon di Fascegn l à endrezà n moment de confront interladin per tor dant la costion linguistica leèda al davegnir del ladin e per entener se l ladin standard l pel esser de didament. Per l’ocajion l è stat portà dant referac da pèrt de Vittorio dell’Aquila, André Comploi e Nadia Chiocchetti. Chesta costion tel passà l’aea soscedà ence polemiches ma ades i tempes i podessa esser madures per fèr neves vèresc inant.
- L grop di studafech de Soraga l à arjont n travert emportant, più avisa i 70 egn da sia fondazion. Per l’ocajion l è stat fat na Messa aposta col Piovan don Andrea Malfatti che dapodò l à ence benedì l meso nef de polisocors endotà de enjignes e èrc modergn per poder ge fèr front a ogne sort de intervent. Tinultima l é stat endrezà na bela festa te Pra del Preve a chela che à tout pèrt duta la comunanza.
- Tel chèder de la scomenzadives metudes a jir per l’Aisciuda Ladina 2025, la Scola Ladina de Fascia l’à endrezà desvalives projec entornvia la toponomastica, che l era l argoment de chesta edizion. Con Pedies sion jic a se fèr contèr più avisa de che che l è stat fat e endrezà da pèrt di dozenc e di studenc de la scoles mesènes e di licees.
I report de chesta setemèna, enjigné da Riccardo Zanoner e Sabrina Riz, i vegn porté dant co la ousc de Sabrina Riz.
Metù a jir col sostegn del Comun General de Fascia, de la Provinzia autonoma de Trent e de la Region autonoma Trentin – Südtirol,“Pedies” l va fora su Trentino Tv – canal 10 Prov. de TN– vigni sabeda da les 18.00 (sie da sera), de domenia da les 13.30 (mesa la does domesdì) e de lunesc da les 11.30 (mesa les doudesc).
L program ades l va fora ence sun AltoAdige TV – canal 11 de BZ – vigni domenia da les 18.00 (sie da sera).
Se pel veder duta la puntates ence sul canal YouTube de TV Ladina sot chest link:
https://www.youtube.com/@TvLadina
opuramenter se pel veder i servijes un a un su la piata Facebook de TV Ladina.
La versione in lingua italiana di questo articolo è stata pubblicata nei giorni scorsi qui su UT24
