Burtzan – Stòrdje vo baibar, arbat un pèrge
Dar Kulturinstitut Lusérn hatt gearn z’zoaga “Burtzan. Stòrdje vo baibar, arbat un pèrge”, da naüge auzlegom von Museo Lusérn, zo halta a mint di baibar vo Lusérn, boda, haltante hèrta hert, håm gemacht übarlem da zimbar mindarhait fin haüt. Di auzlegom, zuargelekk vodar Elena Nicolussi Giacomaz pittar Maura Bello, bart khemmen inaugurart in sunta 25 von madjo, di drai in tages, in Museo Lusérn, vorå, pittn åndarn, dar Vorsitzaren von Kulturinstitut Monica Pedrazza.
Di auzelgom, inngerichtet in vünfte stok von Museo, dar betarste vo alln un boda hèrta khint genützt zo lega auz di naüng djar vor djar, nimmp vür zboa sale ågehenk, un dekht di stòrdja boda geat von djardar ‘700 sin atz halbe von ‘900. Da earst sala bart soin alla zo gedenkha di baibar vo Lusérn.
Pitt sachandar von sèlln zaitn, dokumentari, geschraiba un pildar, makma gian nå in lem von zimbarn baibar, segante di dott vodar spusa, bia da soinse boràtet, ’z gloam, di fading von lem aftn pèrge un di arbatn bosa håm gemacht, azpe nå in höbe, pinn sbèmm, pinn pern azpe di roatpern odar di sbartzpern, nå in vich un in gehaüsra.
Hèrta redante vo arbatn, a toal bart soin da sèll boda gedenkht di Firminia Nicolussi Castellan, komare vo Lusérn bodase iz diplomart in Venedig ’z djar 1953, un daz sèll bose hatt getånt vor di lusernar, pittnan bichtegen beruf, bart soin gezoaget pittn soin ordénje, bodaz laiget di famildja Nicolussi Zaiga.
Übarsetzt von Kulturinstitut Lusérn
La versione in lingua italiana di questo articolo è stata pubblicata nei giorni scorsi su UT24
