La Majon di Fascegn a la defilèda de Carnascèr

Sessaben che ta Ciampedel i é do a endrezèr Carnascèr! La Majon di Fascegn scomenza via col tor pèrt a chest event, desche zenza endrezà con gran gaissa dal Comitat per la manifestazions de paisc, la lingia de scomenzadives metudes a jir per festejèr sie cedean bel toron, chel di 50 egn.

Per fèr chest tant l’à de besegn de sia jent, de muie de fascegn apontin. Belimpont en domenia ai 2 de mèrz, da mesa les trei domesdì, te Piaz de Ciampedel, chi che parteziperà a la defilèda poderà troèr ence n grum de personajes suté fora da la tradizion del carnascèr fascian veia e veiora, che fosc no duc cognosc amò aldidanché. Ponton via da chel mat golous de Jandeluvio, enscin a la Catertempora che bel junfon la sturterà via l Carnascèr. Donca, se siede curiousc l envit l é chel de tor pèrt al Carnascèr de Ciampedel con n cèr, opuramenter regolé e co la faceres de legn tradizionèles.

Sessaben che speton ence la jent che vel vegnir a ge vardèr a dut chest bel rebalton e a cercèr n bon marendel. No mencerà de bela musega per se fèr doi bai en compagnia.

Con chest se vel palesèr che anter i ladins de Fascia la tradizion, e ence chela del Carnascèr, la é amò viva e sćiantiva, e sentuda amò anchecondì dai fascegn. Tel temp de Carnascèr, n temp a la reversa, se pel tor l’ocajion per se goder, fèr da mat, se grignèr e fèr festa en compagnia. A chesta vida se tegn su la tradizion de nesc veies, che ence enlouta i podea se molèr fora mingol de più che tel rest del an, i magnèa magnadiva più bona e ensaorida e i se dajea la mans dintorn per se tor per man un col auter, dant che rue Ciapuin e l temp de Careisema, olache enveze dut l era chiet, out al spirit e a la religion.

La versione in lingua italiana di questo articolo è stata pubblicata nei giorni scorsi su UT24