Euregio, gezoaget da naüge websait meteo.report
Dar naüge boletì von bèttar vor in gåntz Euregio gitt zuar zo maga bizzan betta bèttar ’z bart machan in da gåntz euroredjong: ankunto dar mittarbat von drai Meteorologesche Emtar, est makma garade seng alle di date augenump vo alln in meteorologeschen statziongen von Euregio. Ditza gitt zuar zo maga seng pezzar bazta bart tüan ’z bèttar un alln drai urn di date bartn khemmen vornaügart vor aniaglaz lånt, dise date soin online in inglés (meteo.report), atz taütsch, (meteo.report/de) un atz belesch (meteo.report/it) afte wwebsait von Euregio.
Di naüng vürlegom von bèttar, kamòu vor kamòu, bartn soin inngevüart afte websaitn vodar Provìntz vo Poatzan un aftz Meteotrentino o.
Dar Boletì Meteo Euregio iz khent gezoaget an vraita atz 14 von prachant in daz benedetinar kloster vo Marienberg, in Vinschgau tal, bodase soin gevuntet di Djunta un di versåmmelung von Euregio vor soin earstn trèff untar da südtirólar vorsitzarung.
Dar meteo boletì von Euregio iz online in inglés (meteo.report  ), atz taütsch, (meteo.report/de  ) un atz belesch (meteo.report/it  ) afte websait von Euregio  . Di naüng vürlegom von bèttar, azpe ma hatt sa khött, bartn soin inngevüart afte meteo websaitn vodar Provìntz vo Poatzan  un aftz Meteotrentino  o.
Di rèkord vo Marienberg: da schaung bazta tüat ’z bèttar sidar ’z djar 1856
Di frarn von klòster Marienberg merchan au di temperatùr, in reng un di höache von snea sidar ’z djar 1856. Dise soin zbisnen in eltarstn briavan von gåntz storege taütsch Tiról. Dar frar Anselm Krieg un dar Günther Geier (von Meteorologesche Åmt un vorsorge vor di slavìn) khön ke alle dise date boda nia soin khent untarprocht boda ågian in gåntz Euregio soin gåntz bichte nåzosüacha aftn klima o.
Ãœbarsetzt von Schaltarle vor di zung von Toalkamou vodar Zimbar Hoachebene
