Ju de Limo: En recort de nüsc scizeri dl Tirol
De Lois Taibon.
I scizeri d’La Pli de Mareo á recordé en domënia ai 2 d’aost sön Fanes i 100 agn che la pröma vera dal monn é rota fora.
Sön la cresta dai crëp de Fanes, da Valun Blanch por Furcia Rossa fina ia sön le Lagació passâ la front ince sön terac marô, la secunda ligna de proteziun ea plü encá y passâ en pert por le Ju de Limo.
Ju de Limo
Danló á i scizeri d’La Pli metü sö na crusc l’ultima domënia adöm con delegaziuns de scizeri d’Al Plan, da Patsch, da Natters (Nordtirol) da Ainet y da Lienz (Osttirol). Cösc post é segné con le numer 58 sön la cherta „An der Front 1915-1918“ fata eniann dai scizeri por recordé la front con sü pos? de vera.
Por la festa él empröma gnü metü sö les formaziuns. Le comando â le Hptm. Silvester Ellecosta. Dedô édl sté Signor Heinrich Perathoner, ploan d’La Pli, co á tignà na funziun dla parora. Spo á le scizer Oblt. Michael Ploner cunté dles trepes soferënzes dai scizeri y de düc nüsc antenac endertant i cater agn de vera por tignà i cofins.
La pesc da encö danter i popui, stati y confins é na gran richëza, mo ince por chëra mësson se dé da fá. Y por chëra á trec mossü patà y dé ca la vita. Porchël édl ince gnü comemoré i tomés con la salve dai scizeri d’La Pli.
Comemoraziun
Passan ala pert zivila dla festa, á le Hptm. Silvester Ellecosta salüdé y rengrazié düc por avëi tut pert al dé de comemoraziun. Albert Palfrader, ombolt de Mareo, á ince orü salüdé düc y á recordé te söes parores la gran ferida dla vera por nosta jont y por nosta tera te na contrada, co é encö conesciüda dandadöt por söa beleza.
Wendelin Weingartner, Londeshauptmannn de Tirol en ponsiun, é gnü envié por tignà le discurs de comemoraziun. Ël á laldé i scizeri por l’iniziativa y por le coraje da tignà vi le recort dla pröma vera, co é stada gauja de tan de desgrazia. Al á baié dai scizeri co á combatü y tignà le nemich dalunc da nüsc paisc.
Gran amich dai ladins
Belo la terza generaziun á sën podü cresce sö con la pesc do i ri tomps de batalia y cösc ne pó por Weingartner nia gnà desmoncé. Ince sce la storia s’à spo broderé atramonter ennant, é nosta tera empó na pert de Tirol, á dit Weingartner, co é conesciü tal monn dai scizeri por ester n gran amich dai ladins.
La festa é endöt dër garatada, ince deache ara é gnüda abelida con le sonn de plü musicontri dla Musiga d’La Pli.
