Sëgn plü co mai! Deboriada por nüsc Comuns

Nüsc Comuns é le cör de nosta democrazia y dla vita de nüsc paisc. I rapresentanc locai ti Comuns manajëia tröpes cosses dla vita da vigni de de nostes families, jonëza y impreses por nes garantí n svilup sostenibl y na buna cualité de vita.

Les ëres y i ëi ti consëis de Comun laora cun tröp idealism, profescionalité y dediziun se meton a desposiziun dla sozieté por dé so contribut. Porchël él fondamental che i jun a lité y che i sostegnun ai 20 y 21 de setëmber dales lites de Comun nostes candidates y nüsc candidac dla Val Badia y Gherdëina, co dá döt l’impëgn por lauré tl dagní por l’bëgn de nüsc Comuns. Sostignun ince les candidates y i candidac ladins sön les listes dla SVP aldinfora dles valades ladines.

L’economia locala, l’artejanat, le turism, la natöra y la contrada, les abitaziuns por les families, la vivibilité, la cultura y le lingaz ladin, le plurilinguism, la vita tles uniuns y le volontariat: Chëstes é les fondamëntes dla vita de comunanza de nüsc comuns, chiló messunsé intergní, renforzé, lauré adöm. Cun la zetola litala á vigni zitadin y vigni zitadina che á te sües mans le dagní de nostes families. „Porchël él fondamental da dé jö la usc personala y ti dé forza ales porsones che se mët a desposiziun por svilupé inant nüsc valurs soziai, economics y culturai“, recorda le suranstant dl SVP Ladina Daniel Alfreider.

„I ti damani a düć da ti dé la crëta a nostes candidates y a nüsc candidac, che porta para profescionalité, competënza y buna orenté, dai sostigní a na moda che ai pois lauré por le bëgn de nos düć y por le dagní de nüsc mituns y mitans.“

Dé jö süa usc é n dërt fondamental por düc i zitadins sura i 18 agn che sotrissëia la responsabilité soziala por le singul e düta la comunité: al ne vëgn nia ma legitimé la rapresentanza politica, mo al é ince le sostëgn fondamental por le svilup dla vita dles comunités te nüsc comuns. Lita porchël la SVP por avëi inant na raprejentanza sterscia ti proscims 5 agn.